- დეტალები
- ავტორი Chateau Chikovani
- განყოფილება: მამული
- ნანახია: 569 -ჯერ
სტუმრებს ვთავაზობთ ერთდღიან მოგზაურობას ულამაზეს ასხის მასივზე. ამ მოგზაურობას 2026 წლამდე მხოლოდ ერთეულები თუ ახერხებდნენ და დაკავშირებული იყო დიდ სირთულეებთან.
ახალი გზა, შესაძლებლობას იძლევა, მაღალი გამავლობის ავტომობილებით, ერთ დღეში დაათვალიერო ეს უმშვენიერესი ადგილი.
ასხის მასივი მდებარეობს ალპურ ზონაში, ზღვის დონიდან საშუალოდ 2200 მეტრ სიმაღლეზე. მისი უმაღლესი წერტილია მთა გადრეკილი, სიმაღლე 2519 მეტრი.
მასივი განფენილია იმერეთის, ლეჩხუმისა და სამეგრელოს საზღვარზე.
გზა ასხისაკენ გადის სოფელ კინჩხასა და ოკაცის წყალვარდნილზე. შემდეგ რამდენიმე კილომეტრი გზა მიემართება უსიერ ტყის მასივში. აქ გაივლით ასწლოვანი წიფლის, რცხილისა და ცაცხვის უზარმაზარი ხეების ჩრდილში.
ალპური ზონა იწყება ასხის მასივის სამხრეთ ფერდობზე, რომელიც დაფარულია წარმოუდგენელი ფერების მინდვრის ყვავილების ხალიჩით.
უღელტეხილი მდებარეობს 2300 მეტრ სიმაღლეზე. უღელტეხილის გადავლის შემდეგ თქვენ წინ გადაიშლება მასივის უკიდეგანო სივრცე.
ეს სივრცე დასავლეთით შემოსაზღვრულია სამეგრელოს მხარით და მდინარე ტეხურით, ჩრდილოეთიდან სვანეთის ულამაზესი მთებით, აღმოსავლეთით კი ცხენისწყლითა და ლეჩხუმით, რომელსაც აგვირგვინებს ზღაპრული ხვამლის მთა.
ადრე ამ ადგილს უწოდებდნენ ცხენების სამოთხეს. ყოველ ზაფხულს აქ, ახლო მდებარე რაიონებიდან ამოჰყავდათ ცხენები ზაფხულის საძოვრებზე. ახლაც ძალიან ბევრი ცხენია. ხშირად ისინი ერთად იკრიბებიან და დიდი სიჩქარით დაქრიან ამ ველებზე.
- დეტალები
- ავტორი Chateau Chikovani
- განყოფილება: მამული
- ნანახია: 30323 -ჯერ
სტუმრებს ვთავაზობთ ექსკურსიას ისტორიულ მამულში. მამულისა და გვარის ისტორია მოცემულია ამ საიტის წინა გვერზე - „ჩიქოვანების მამული“.
ექსკურსია მოიცავს ასწლოვანი ხეებით დახუნძლული ძველი ეზოს დათვალიარებას. ერთ-ერთი ცაცხვის ხის ასაკი 500 წელს აღწევს. ძველი სახლის დარბაზის კედლებზე გამოსახულია ბარელიეფები, რომლებიც ცოცხლად ასახავს მამულის ისტორიას.
აქვეა წარმოდგენილი ოთხსაუკუნოვანი გენიალოგიური ხე. ამ ხის ცენტრალური ფიგურაა დიმიტრი ჩიქოვანი, რომელიც იყო დადიანების ბოლო სახლთუხუცესი და რომელსაც ჰყავდა 16 შვილი ერთი მეუღლისგან.
სტუმრებს შესაძლებლობა აქვთ დაათვალიერონ ღვინის ძველი მარანი, დააგემოვნონ ღვინოები და სხვა სასმელები.
ასევე შესაძლებელია ღვინის უძველესი წნეხის ნახვა, რომლის ასაკი არავინ იცის, მაგრამ ის დღემდე გამართულად ფუნქციონირებს.
აქვეა ჭურები (ქვევრი) და სპირტის სახდელი ავსტრიული აპარატი. ამ აპარატით მზადდება „ჭაჭა“, ხილის არყები, ასევე კონიაკი და კალვადოსი.
სტუმრებს შესაძლებლობა აქვთ დაათვალიერონ ვენახი, ვაზის ხეივანი (ტალავერი) და ხეხილის ბაღები.
ბოლოს, ასევე შესაძლებელია გასართობი დარბაზისა და საბილიარდოს დათვალიერება.
- დეტალები
- ავტორი Chateau Chikovani
- განყოფილება: მამული
- ნანახია: 37676 -ჯერ
ჩიქოვანების გვარი სათავეს იღებს სვანეთიდან. საუკუნეების წინ, გვარმა მიგრაცია განიცადა ლეჩხუმში, იმერეთსა და სამეგრელოში. ჩიქოვანების გვარის ერთი შტო, რომელიც 1704 წლიდან ფლობდა სამეგრელოს მთავრის - დადიანის ტიტულს უკავშირდება სოფელ გორდს.
გორდელი აზნაური, კაცია ჩიქოვანი ძალიან დაწინაურდა ლევან III დადიანის მართველობის დროს (1661 – 1689 წ). იმერეთის მეფემ, ბაგრატ IV-მ, მას ვეზირის წოდება მიანიჭა და ლეჩხუმის საინსარიძოც დაუთმო.
მალევე, კაცია იკავებს სამეგრელოს მთავრის კარის „უფროსობას“. დადიანმა კაციას სალიპარიტიანო მისცა და, როგორც ამ კუთხის მფლობელი ლიპარიტიანად აღიარა. ჩიქოვანის გაძლიერებას ხელი შეუწყო იმერეთის მეფესა და დადიანს შორის ჩამოვარდნილმა დაპირისპირებამ ლეჩხუმისათვის. კაციამ ისარგებლა დაპირისპირებით და დაიწყო სამეგრელოს თავადების და თვით კარის დიდებულების შევიწროება.
1704 წელს კაციას ინიციატივით მისი შვილიშვილი კაცია I, დადიანად აკურთხეს და იგი ოდიშის სამთავროს ახალ (დადიანთა) დინასტიას ჩაუდგა სათავეში.
უჩა და ოლია
კაციას ჩიქოვანის ძმა, ევდომოს ჭყონდიდელი, გახლდათ მარტვილის მთავარეპისკოპოსი. მარტვილის მონასტერს ყოველთვის მნიშვნელოვანი ადგილი ეკავა საქართველოს ისტორიაში. ამ მონასტერმა თავის დროზე, გიორგი ჭყონდიდელის ხელმძღვანელობით, ფასდაუდებელი როლი შესრულა დავით აღმაშენებლის აღზრდაში.
დიმიტრი
ჩიქოვანების გვარის ამ შტოს გადადიანებაში, ბაგრატ IV - ის გარდა თავისი წვლილი შეუტანია სამეგრელოში ევდომოს ჭყონდიდელის ავტორიტეტს.
გორდში დადიანების სასახლის ბოლო სახლთუხუცესი იყო ჩვენი დიდი ბაბუა - დიმიტრი კონსტანტინეს ძე ჩიქოვანი (1863 - 1937) . დიმიტრის სამი ვაჟი შეეწირა საბჭოთა ხელისუფლების წინააღმდეგ ბრძოლას. თავად დიმიტრისაც 1937 წელს, 74 წლის ჭარმაგ მოხუცს საბჭოთა ხელისუფლებამ დახვრეტა მიუსაჯა.
დიმიტრის დიდი ბაბუა - ბეკო (1780 - ?), იყო ამ მამულის დამფუძნებელი. ბეკოს ჰყავდა 4 შვილი, 10 შვილიშვილი და 11 შვილთაშვილი. ერთ-ერთი შვილთაშვილი იყო დიმიტრი, რომელსაც 16 შვილი ჰყავდა.
სამწუხაროდ, დღეისათვის, ჩიქოვანების ამ ძირძველ შტოს, გვარის გამგრძელებლად ჰყავს მხოლოდ ორი ახალგაზრდა: დიმიტრი თამაზის ძე და პაპუნა უჩას ძე.
ბოლო წლებში სიტუაცია შეიცვალა 2018, 2021 და 2025 წლებში ამ ქვეყანას კიდევ მოევლინა სამი, გვარის გამგრძელებელი ვაჟკაცი: უჩა, ალექსანდრე და ვაჩე პაპუნას ძე ჩიქოვანები.
გასული საუკუნის 30 - იან წლების ბოლოს, როდესაც რეპრესიების გამო ძალიან გაუჭირდა ამ მამულს, მას ბათუმიდან მხსნელად მოევლინა ქალბატონი ოლია (დომნა) გოგელია, უჩა დიმიტრის ძის მეუღლე. სწორედ ამ ქალბატონის დამსახურებაა ამ მამულის სიცოცხლის შენარჩუნება. იგი 98 წლის ასაკში გარდაიცვალა. ქალბატონმა ოლიამ სიცოცხლის ბოლომდე შეინარჩუნა საღი აზრი და არაჩვეულებრივი იუმორი. როგორც თავად ამბობდა შრომამ გააძლებინა ამდენი ხანი. ამის დამადასტურებელი იყო მის დაკოჟრილი ხელები. მის ცხოვრებაში ერთ-ერთი მთავარი ადგილი ეკავა სტუმრების მიღებას. ალბათ იმიტომ, რომ სტუმრიანობა, მისთვის იყო თავისი შრომითი მიღწევების გამოფენის შესაძლებლობა. მისი სული ალბათ დღესაც გახარებულია, მის მაგალითზე აღზრდილმა შვილიშვილებმა და შვილთაშვილებმა შეინარჩუნეს ეს ტრადიცია.
ღმერთმა დალოცოს საქართველო და ჩიქოვანების მამული!
ისტორიული ფოტოები
დიმიტრი ჩიქოვანი შვილებთან
(მარცხნიდან პირველი)
დიმიტრი ჩიქოვანის ქალიშვილები
დიმიტრი ჩიქოვანის შვილიშვილები
უჩა ჩიქოვანი
